sharminda ham junuun se hain ek ek taar ke
— Tabish Dehlvi
Sharminda ham junoon se hain ek ek taar ke
Kyaa keejiye ki din hain abhee tak bahaar ke
Ai umr-e-shauq dekhiye miltaa hai kyaa javaab
Ham ne kisee kaa naam liyaa hai pukaar ke
Sar-gashta-e-alam ho ki shoreeda-sar koee
Ehsaan hain ahl-e-shauq pe deevaar-e-yaar ke
Allaah re intizaar-e-bahaaraan kee lazzaten
Guzree hai yuun khizaan bhee ki din hon bahaar ke
'taabish' sukoon-e-dard se taskeen-e-marg tak
Dil ho agar to laakh hain pahloo qaraar ke