soz parvar nigaah rakhte hain
— Tabish Dehlvi
Soz-parvar nigaah rakhte hain
Ham nazar men bhee aah rakhte hain
Is hujoom-e-tajalliyaat men ham
Hasrat-e-yak-nigaah rakhte hain
Ye ta.alluq jahaan se kaafee hai
Aap se rasm-o-raah rakhte hain
Bakhsh degaa vo bakhshne vaalaa
Bas ye uzr-e-gunaah rakhte hain
Ham hijaabaat se naheen maayoos
Jalva pesh-e-nigaah rakhte hain
Gham vaseela hai aur too maqsood
Ham ye manzil ye raah rakhte hain
Ek jalva dikhaa naheen sakte
Vo jo ik jalva-gaah rakhte hain
Koee aalam ho hazrat-e-'taabish'
Kaj hamesha kulaah rakhte hain