yuun to ye anfus o aafaaq hain mazhar mere

Yuun to ye anfus-o-aafaaq hain maz.har mere Ek duniyaa abhee aabaad hai andar mere Daa.era-vaar naheen ek hee markaz ko muheet Main vo parkaar badalte rahe mehvar mere Kitne dukh hain jo rahe tishna-e-iz.haar ab tak Kooza-e-harf se simTe na samundar mere Apne qaamat kaa bhee andaaza ho kuchh to mujh ko Lekin aataa hee naheen koee baraabar mere Jin mahaazon pe qavee paayaa na dushman apnaa Un mahaazon se palaT aa.e hain lashkar mere Har qadam par miree pahchaan badal jaatee hai Jitne rishte hain mire utne hee paikar mere Aasmaan-geer hai is habs men meree parvaaz In fazaaon men tavaanaa to hain shahpar mere Mushtarak jazba-e-iz.haar ho phir kyon na kahoon Sab sukhan mere hain aur saare sukhanvar mere Mere inkaar kee tauheen na kiije 'taabish' Aap aanken na khazaf-rezon se gauhar mere