main ne ye kab kahaa hai ki vo mujh ko tanhaa nahiin chhodtaa

Main ne ye kab kahaa hai ki vo mujh ko tanhaa naheen chhoDtaa ChhoDtaa hai magar ek din se ziyaada naheen chhoDtaa Kaun sahraaon kee pyaas hai in makaanon kee buniyaad men Baarishon se agar bach bhee jaa.en to dariyaa naheen chhoDtaa Duur ummeed kee khiDkiyon se koee jhaanktaa hai yahaan Aur mere galee chhoDne tak dareecha naheen chhoDtaa Main jise chhoD kar tum se chhup kar milaa huun agar aaj vo Dekh letaa to shaayad vo donon ko zinda naheen chhoDtaa Kaun-o-imakaan men do tarah ke hee to sho.abada-baaz hain Ek parda giraataa hai aur ek parda naheen chhoDtaa Sach kahoon meree qurbat to khud us kee saanson kaa vardaan hai Main jise chhoD detaa huun us ko qabeela naheen chhoDtaa Tai-shuda vaqt par vo pahunch jaataa hai pyaar karne vasool Jis tarah apnaa qarza kabhee koee baniyaa naheen chhoDtaa Pahle mujh par bahut bhaunktaa hai ki main ajnabee huun koee Aur agar ghar se jaane kaa boloon to kurtaa naheen chhoDtaa Log kahte hain tahzeeb 'haafee' use chhoD kar Thiik hai Hijr itnaa hee aasaan hotaa to taunsa naheen chhoDtaa