teraa chup rahnaa mire zehn men kyaa baith gayaa
— Tahzeeb Hafi
Teraa chup rahnaa mire zehn men kyaa baiTh gayaa
Itnee aavaazen tujhe diin ki galaa baiTh gayaa
Yuun naheen hai ki faqat main hee use chaahtaa huun
Jo bhee us peD kee chhaanv men gayaa baiTh gayaa
Itnaa meeThaa thaa vo ghusse bharaa lahja mat poochh
Us ne jis jis ko bhee jaane kaa kahaa baiTh gayaa
Apnaa laDnaa bhee mohabbat hai tumhen ilm naheen
Cheekhtee tum rahee aur meraa galaa baiTh gayaa
Us kee marzee vo jise paas biThaa le apne
Is pe kyaa laDnaa fulaan meree jagah baiTh gayaa
Baat dariyaaon kee sooraj kee na teree hai yahaan
Do qadam jo bhee mire saath chalaa baiTh gayaa
Bazm-e-jaanaan men nashisten naheen hoteen makhsoos
Jo bhee ik baar jahaan baiTh gayaa baiTh gayaa