tire khayaal aur tire dhiyaan se pare kaa huun
— Tahzeeb Hafi
Tire khayaal aur tire dhiyaan se pare kaa huun
Main zaa.iqa huun aur tiree zabaan se pare kaa huun
Mire liye naheen banee hain ye samay kee seeDhiyaan
So main atiit aur vartamaan se pare kaa huun
Too kaun hai ki jo mujhe mire hadaf bataa.egaa
Main tiir huun magar tiree kamaan se pare kaa huun
Agar naheen huun main to phir vujood kyaa shu'oor kyaa
Agar main huun to phir main is jahaan se pare kaa huun
Agar chaloon to do qadam ke baa'd ye zameen naheen
Agar uDuun to tere aasmaan se pare kaa huun
Kahaa thaa mere aage apnee nazm pesh mat karo
Ki main tumhaare she'ree khaandaan se pare kaa huun