vahaan us ne jaane kii baat kii yahaan meraa chehra utar gayaa
— Tahzeeb Hafi
Vahaan us ne jaane kee baat kee yahaan meraa chehra utar gayaa
Miraa aa.eena mujhe dekh kar mire khaal-o-khad se mukar gayaa
Vo miraa naheen bhee to kyaa huaa mujhe us kee khushiyaan 'azeez hain
Use pahlee beTee 'ataa huee miraa ghar khilaunon se bhar gayaa
Main mohabbaton kee qabeel se kisee ghar kaa aakhiree fard huun
Kaheen chaand dekhaa to ro paDaa kaheen phuul dekhe to Dar gayaa
Hamen fursaten hee kahaan mileen ki ham ek duuje ko dekhte
Kabhee chaand aa gayaa abr men kabhee main bhee chhat se utar gayaa
Mire be-niyaaz tiree talab kaa mu'aamla hee kuchh aur hai
Koee teree dhuup men jee uThaa koee teree chhaaon men mar gayaa
Too pukaartaa na phire kaheen mujhe dasht-e-zo'm-e-gurez men
Main huun ek lamha-e-raa.igaan main guzar gayaa to guzar gayaa