zakhmon ne mujh men darvaaze khole hain
— Tahzeeb Hafi
Zakhmon ne mujh men darvaaze khole hain
Main ne vaqt se pahle Taanke khole hain
Baahar aane kee bhee sakat naheen ham men
Too ne kis mausam men pinjre khole hain
Barson se aavaazen jamtee jaatee thiin
Khaamoshee ne kaan ke parde khole hain
Kaun hamaaree pyaas pe Daakaa Daal gayaa
Kis ne mashkeezon ke tasme khole hain
Varna dhuup kaa parbat kis se kaTtaa thaa
Us ne chhatree khol ke raste khole hain
Ye meraa pahlaa ramzaan thaa us ke baghair
Mat poochho kis munh se roze khole hain
Yuun to mujh ko kitne khat mausool hue
Ik do aise the jo dil se khole hain
Mannat maanne vaalon ko maaloom naheen
Kis ne aa kar peD se dhaage khole hain
Dariyaa band kiyaa hai kuuze men 'tahzeeb'
Ik chaabee se saare taale khole hain