Abhi kisi ke na mere kahe se guzregaa

Abhee kisee ke na mere kahe se guzregaa Vo khud hee ek din is daa.ere se guzregaa Bharee rahe abhee aankhon men us ke naam kee niind Vo khvaab hai to yoonhee dekhne se guzregaa Jo apne aap guzartaa hai koocha-e-dil se Mujhe gumaan tha mire mashvare se guzregaa Qareeb aane kee tamheed ek ye bhee rahi Vo pahle pahle zaraa faasle se guzregaa Qusoor-vaar nahin phir bhee chhuptaa phirtaa hoon Vo meraa chor hai aur saamne se guzregaa Chhupee ho shaayad isee men salaamtee dil kee Ye rafta rafta agar TooTne se guzregaa Hamaaree saada-dilee thee jo ham samajhte rahe Ki aks hai to isee aa.eene se guzregaa Samajh hamen bhee hai itnee ki us kaa ahd-e-sitam Guzaarnaa hai to ab hausle se guzregaa Galee galee mire zarre bikhar ga.e the 'zafar' Khabar na thee ki wo kis raaste se guzregaa Abhi kisi ke na mere kahe se guzrega Wo KHud hi ek din is daere se guzrega Bhari rahe abhi aankhon mein us ke nam ki nind Wo KHwab hai to yunhi dekhne se guzrega Jo apne aap guzarta hai kucha-e-dil se Mujhe guman tha mere mashware se guzrega Qarib aane ki tamhid ek ye bhi rahi Wo pahle pahle zara fasle se guzrega Qusur-war nahin phir bhi chhupta phirta hun Wo mera chor hai aur samne se guzrega Chhupi ho shayad isi mein salamti dil ki Ye rafta rafta agar TuTne se guzrega Hamari sada-dili thi jo hum samajhte rahe Ki aks hai to isi aaine se guzrega Samajh hamein bhi hai itni ki us ka ahd-e-sitam Guzarna hai to ab hausle se guzrega Gali gali mere zarre bikhar gae the 'zafar' KHabar na thi ki wo kis raste se guzrega