dekho to Kuch ziyaan nahin khone ke baavajuud
— Zafar Iqbal
Dekho to Kuch ziyaan nahin khone ke baavajood
Hotaa hai ab bhee ishq na hone ke baavajood
Shaayad ye khaak men hee samaane kee mashq ho
Sotaa hoon farsh par jo bichhaune ke baavajood
Kartaa hoon niind men hee safar saare shahr kaa
Faarigh to baiThtaa nahin sone ke baavajood
Hotee nahin hai meree tasallee kisee tarah
Rone kaa intizaar hai rone ke baavajood
Paanee to ek umr se mujh par hai be-asar
Mailaa hoon jaise aur bhee dhone ke baavajood
Bojhal to main Kuch aur bhee rahtaa hoon raat din
Saamaan-e-khvaab raat ko Dhone ke baavajood
Thee pyaas to vaheen kee vaheen aur main vahaan
Khush thaa zaraa saa honT bhigone ke baavajood
Ye keemiyaa-garee miree apnee hai is liye
Main raakh hee samajhtaa hoon sone ke baavajood
Dartaa hoon phir kaheen se nikaalen na sar 'zafar'
Main us ko apne saath Dubone ke baavajood
Dekho to Kuch ziyan nahin khone ke bawajud
Hota hai ab bhi ishq na hone ke bawajud
Shayad ye KHak mein hi samane ki mashq ho
Sota hun farsh par jo bichhaune ke bawajud
Karta hun nind mein hi safar sare shahr ka
Farigh to baiThta nahin sone ke bawajud
Hoti nahin hai meri tasalli kisi tarah
Rone ka intizar hai rone ke bawajud
Pani to ek umr se mujh par hai be-asar
Maila hun jaise aur bhi dhone ke bawajud
Bojhal to main Kuch aur bhi rehta hun raat din
Saman-e-KHwab raat ko Dhone ke bawajud
Thi pyas to wahin ki wahin aur main wahan
KHush tha zara sa honT bhigone ke bawajud
Ye kimiya-gari meri apni hai is liye
Main rakh hi samajhta hun sone ke bawajud
Darta hun phir kahin se nikalen na sar 'zafar'
Main us ko apne sath Dubone ke bawajud