na ghaat hai koi apna na ghar hamaaraa huaa
— Zafar Iqbal
Na ghaaT hai koi apna na ghar hamaaraa huaa
Qayaam ab ke sar-e-rah-guzar hamaaraa huaa
Gharaz rahi na kabhi manzilon se koi hamen
Hamesha apne hee andar safar hamaaraa huaa
Usee kee raushnee kaam aa.ee umr-bhar apne
Jo ik sitaara faqat shaam-bhar hamaaraa huaa
Hamaare hisse men deevaar hee rahi din raat
Koee dareecha hamaaraa na dar hamaaraa huaa
Hamaare Khoon se guzar kar hee tegh-e-barq bujhee
Hamaare khas men utar kar sharar hamaaraa huaa
Zar-e-sukhan jo luTaayaa hai raaste men kaheen
To duur dasht-e-havaa men khatar hamaaraa huaa
Rahe hain be-samar o saaya hee sar-e-hastee
Baraa.e naam yahaan par shajar hamaaraa huaa
Isee men uljhe hue hain hamaare paanv abhee
Jo ek khvaab kabhi sar-ba-sar hamaaraa huaa
Kisee sanad kee zaroorat nahin paDee hai 'zafar'
Hamaaraa aib hee aakhir hunar hamaaraa huaa
Na ghaT hai koi apna na ghar hamara hua
Qayam ab ke sar-e-rah-guzar hamara hua
Gharaz rahi na kabhi manzilon se koi hamein
Hamesha apne hi andar safar hamara hua
Usi ki raushni kaam aai umr-bhar apne
Jo ek sitara faqat sham-bhar hamara hua
Hamare hisse mein diwar hi rahi din raat
Koi daricha hamara na dar hamara hua
Hamare KHun se guzar kar hi tegh-e-barq bujhi
Hamare KHas mein utar kar sharar hamara hua
Zar-e-suKHan jo luTaya hai raste mein kahin
To dur dasht-e-hawa mein KHatar hamara hua
Rahe hain be-samar o saya hi sar-e-hasti
Barae nam yahan par shajar hamara hua
Isi mein uljhe hue hain hamare panw abhi
Jo ek KHwab kabhi sar-ba-sar hamara hua
Kisi sanad ki zarurat nahin paDi hai 'zafar'
Hamara aib hi aaKHir hunar hamara hua