yuun bhi hota hai ki yak dam koi achchhaa lag jaae

Yuun bhee hota hai ki yak dam koi achchhaa lag jaa.e Baat Kuch bhee na ho aur dil men tamaashaa lag jaa.e Ham savaalaat kaa hal soch rahe hon abhee tak Aur maathe pe mohabbat kaa nateeja lag jaa.e Abhee deevaar uThaa.ee bhee na ho dil kee taraf Lekin is men koi dar koi dareecha lag jaa.e Kyaa sitam hai ki vahee duur raha ho tum se Aur usee shakhs pe ilzaam tumhaaraa lag jaa.e Puuree awaaz se ik roz pukaaroon tujh ko Aur phir meree zabaan par tiraa taalaa lag jaa.e Aur to is ke savaa Kuch nahin imkaan ki ab Mere Dariya men kaheen teraa kinaara lag jaa.e Main ne aur dil ne isee baab men sochaa hai ki ham Kaam Kuch bhee na karen koi vazeefa lag jaa.e Kyaa tamaashaa hai ki baaqee ho samundar kaa safar Aur saahil se kisee roz safeena lag jaa.e Ye bhee mumkin hai ki is kaar-gah-e-dil men 'zafar' Kaam koi kare aur naam kisee kaa lag jaa.e Yun bhi hota hai ki yak dam koi achchha lag jae Baat Kuch bhi na ho aur dil mein tamasha lag jae Hum sawalat ka hal soch rahe hon abhi tak Aur mathe pe mohabbat ka natija lag jae Abhi diwar uThai bhi na ho dil ki taraf Lekin is mein koi dar koi daricha lag jae Kya sitam hai ki wahi dur raha ho tum se Aur usi shaKHs pe ilzam tumhaara lag jae Puri aawaz se ek roz pukarun tujh ko Aur phir meri zaban par tera tala lag jae Aur to is ke sawa Kuch nahin imkan ki ab Mere dariya mein kahin tera kinara lag jae Main ne aur dil ne isi bab mein socha hai ki hum Kaam Kuch bhi na karen koi wazifa lag jae Kya tamasha hai ki baqi ho samundar ka safar Aur sahil se kisi roz safina lag jae Ye bhi mumkin hai ki is kar-gah-e-dil mein 'zafar' Kaam koi kare aur nam kisi ka lag jae