aisaa lagtaa hai jaise puurii hai
— Zeeshan Sahil
Aisaa lagtaa hai jaise puuree hai
Ye kahaanee magar adhooree hai
Hijr to khair us kaa laazim thaa
Vasl bhee ab bahut zarooree hai
Meree aankhon ke jurm men shaamil
Un nigaahon kee be-qusooree hai
Mere alfaaz ho rahe hain kharch
Qaum kee muft men mash.hooree hai
Yuun miraa taaj-o-takht chheen liyaa
Jaise vo sher-shah-sooree hai
In dinon us ke saamne dil kee
Jee-huzooree hee jee-huzooree hai
Kis qadar shokh kar diyaa mujh ko
Ishq miTThoo-miyaan kee chooree hai