dil muztarib hai aur pareshaan jism hai
— Zeeshan Sahil
Dil muztarib hai aur pareshaan jism hai
Us ke baghair be-sar-o-saamaan jism hai
Ab ho naheen sakegaa mudaavaa kisee tarah
Vo jo kaheen naheen hai to be-jaan jism hai
Dil to junoon ke khel men masroof hai magar
Us kee navaazishaat pe hairaan jism hai
Main ne banaa diyaa hai jise ishq men ghazal
Dil us kaa hai bayaaz to deevaan jism hai
Ab us ke gham se mujh ko milegee kahaan najaat
Dil paasbaan hai aur nigahbaan jism hai