gard e safar men raah ne dekhaa nahiin mujhe
— Zeeshan Sahil
Gard-e-safar men raah ne dekhaa naheen mujhe
Ik umr mahr o maah ne dekhaa naheen mujhe
Achchhaa huaa ki khaak-nasheenon ke roo-ba-roo
Us shahr-e-kaj-kulaah ne dekhaa naheen mujhe
Main dekhtaa thaa rang badaltee huee nigaah
Badlee huee nigaah ne dekhaa naheen mujhe
Meree sadaa vahaan pe tujhe kaise DhoonDtee
Teree jahaan panaah ne dekhaa naheen mujhe
Har mauj-e-dard khud main utaare chalaa gayaa
'saahil' dil-e-tabaah ne dekhaa naheen mujhe