is dasht e be panaah kii had par bhii khush nahiin
— Zeeshan Sahil
Is dasht-e-be-panaah kee had par bhee khush naheen
Main apnee khvaahishon se bichhaD kar bhee khush naheen
Ik sarkhushee muheet hai chaaron taraf magar
Bastee men koee shakhs koee ghar bhee khush naheen
Kitne hain log khud ko jo kho kar udaas hain
Aur kitne apne-aap ko paa kar bhee khush naheen
Ye kaifiyat ghulaam naheen qaid-o-band kee
Andar jo apne khush naheen baahar bhee khush naheen
Saahil kee bheegee ret pe chaltaa barahna-paa
Main huun udaas aur samundar bhee khush naheen