apne qadmon hii kii aavaaz se chaunkaa hotaa

Apne qadmon hee kee aavaaz se chaunkaa hotaa Yuun mire paas se ho kar koi guzraa hotaa Chaandnee se bhee sulag uThtaa hai veeraana-e-jaan Ye agar jaante sooraj hee ko chaahaa hotaa Zindagee khvaab-e-pareshaan hai bahaar ek khayaal In ko milne se bahut pahle ye sochaa hotaa Dopahar guzree magar dhoop kaa aalam hai vahee Koi saaya kisee deevaar se utraa hotaa Ret uD uD ke havaaon men chalee aatee hai Shahr-e-armaan sar-e-sahraa na basaayaa hotaa Aarzoo umr-e-gurezaan to nahin tum to nahin Ye saraktaa huaa lamha kaheen Thahraa hotaa Peechhe peechhe koi saaya saa chalaa aataa thaa Haa.e wo kaun thaa muD kar use dekhaa hotaa Tujh se yak go na ta.alluq mujhe ik umr se thaa Zindagee too ne hee baDh kar mujhe rokaa hotaa Jaane kya soch ke logon ne bujhaa.e hain charaagh Raat kaTtee to sahar hotee ujaalaa hotaa Apne daaman ko jalaa kar main charaaghaan kartaa Agar is raakh men 'akhtar' koi sho.ala hotaa