baarhaa thithkaa huun khud bhii apnaa saaya dekh kar
— Akhtar Hoshiyarpuri
Baarhaa ThiThkaa huun khud bhee apnaa saaya dekh kar
Log bhee katraa.e kya kya mujh ko tanhaa dekh kar
Mujh ko is kaa gham nahin sailaab men ghar bah ga.e
Muskuraayaa huun main be-mausam kee barkhaa dekh kar
Ret kee deevaar men shaamil hai khoon-e-zeest bhee
Ai havaao soch kar ai mauj-e-dariyaa dekh kar
Apne haathon apnee aankhen band karnee paD ga.iin
Nighat-e-gul ke jilau men gard-e-sahraa dekh kar
Mere chehre par kharaashen hain lakeeren haath kee
Meree qismat paDhne vaale meraa chehraa dekh kar