dar o diivaar pe ik saaya padaa hai dekho

Dar-o-deevaar pe ik saaya paDaa hai dekho Mere raste men koi jaise khaDaa hai dekho Zarra-e-khaak ko sar par liye phirtee hai havaa Aur patthar ki zameen men hee gaDaa hai dekho Is qadar bhiiD hai raste men ki chalnaa hai muhaal Aur baadal ki abhee sar pe khaDaa hai dekho Apnee hee zaat ke saa.e men chhupaa baiThaa huun Ki miraa saaya bhee to mujh se baDaa hai dekho Mauj-e-dariyaa ko samundar se mafar mushkil hai LauT bhee aao ki ye rasta kaDaa hai dekho Koi to aa.e mujhe aa ke bachaa.e is se Meree dahleez pe ik shakhs khaDaa hai dekho Sar pe toofaan bhee hai saamne girdaab bhee hai Meree himmat ki vahee kachchaa ghaDaa hai dekho Sar kaTaa kar bhee khaDaa huun sar-e-maidaan akhtar Is tarah jang yahaan kaun laDaa hai dekho