dil men ik jazba e bedaad o jafaa hii hogaa
— Akhtar Hoshiyarpuri
Dil men ik jazba-e-bedaad-o-jafaa hee hogaa
Wo khudaa-vand bhee hogaa to khudaa hee hogaa
Gard see uDtee nazar aatee hai aandhee hogee
Duur tak naqsh-e-qadam hain koi raahee hogaa
Ham se jo poochhnaa hai poochh lo varna kal tak
Kis ko andaaza-e-naa-karda-gunaahee hogaa
Kaheen girtee huee deevaaren kaheen jhuktee chhaten
Aap kahte hain to ye qasr-e-wafa hee hogaa
Phuul se tarse hue log kharaabon men kahaan
Dasht-e-vahshat men koi aabla-paa hee hogaa
Jaate jaate mire darvaaze ke paT khol ga.ee
Ye bhee 'akhtar' koi andaaz-e-sabaa hee hogaa