gae zamaane kii suurat badan churaae wo

Ga.e zamaane kee soorat badan churaa.e wo Na.ee ruton kee tarah se bhee muskuraa.e wo Hazaar meree nafee bhee kare wo meraa hai Ki mere hone kaa ehsaas bhee dilaa.e wo Har ek shakhs yahaan apne dil kaa maalik hai Main laakh us ko bulaa.oon magar na aa.e wo Havaa kee aahaTen suntaa huun dhaDkanon kee tarah Misaal-e-sham.a mujhe raat-bhar jagaa.e wo Mire badan ko lahoo-rang pairahan bhee de Miree qabaa se mire zakhm bhee chhupaa.e wo Miree ragon kaa lahoo bint-e-am se miltaa hai Main apnaa aap bhee dekhoon to yaad aa.e wo Tamaam raat guzaaree hai kirchiyaan chunte Sahar huee to nayaa aa.ina dikhaa.e wo Miraa vajood kitaabon men harf harf huaa Khudaa kare miree aavaaz ban ke aa.e wo Wo ek sho.ala-e-javvaala jo chhue jal jaa.e Magar khud apne hee saa.e se khauf khaa.e wo Ye kya ki mujh ko chhupaayaa hai meree nazron se Kabhi to mujh ko mire saamne bhee laa.e wo Main apne aap se niklaa to saamne wo thaa Aur ab ye soch rahaa huun kaheen ko jaa.e wo PalaT chukaa huun varaq zindagee ke ai 'akhtar' Hareem-e-shab men dabe paanv phir bhee aa.e wo