harf e be aavaaz se dahkaa huaa
— Akhtar Hoshiyarpuri
Harf-e-be-aavaaz se dahkaa huaa
Ik diyaa huun taaq men jaltaa huaa
Is taraf deevaar ke bhee main hee thaa
Us taraf bhee main hee thaa baiThaa huaa
Aanganon men phuul the mahke hue
KhiDkiyon men chaand thaa Thahraa huaa
Kore kaaghaz par ajab tahreer thee
PaDhte paDhte main jise andhaa huaa
Kya kahoon dast-e-havaa ke shobade
Ret par ik naam thaa likkhaa huaa
Mere khuun kee gardishen bhee baDh ga.iin
Us qabaa kaa rang bhee gahraa huaa
Ungliyon men us badan kaa loch hai
Rang-o-khushboo kaa safar taazaa huaa
Raat bhar jis kee sadaa aatee rahee
Sochtaa huun wo parinda kya huaa
Jaagtee aankhon men 'akhtar' aks kya
Main ne dekhaa qaafilaa jaataa huaa