hariif e daastaan karnaa padaa hai
— Akhtar Hoshiyarpuri
Hareef-e-daastaan karnaa paDaa hai
Zameen ko aasmaan karnaa paDaa hai
Nikal kar aa ga.e hain jangalon men
Makaan ko laa-makaan karnaa paDaa hai
Savaa neze pe sooraj aa gaya thaa
Lahoo ko saa.ebaan karnaa paDaa hai
Bahut taareek thiin hastee kee raahen
Badan ko kahkashaan karnaa paDaa hai
Kise ma.aloom lams un ungliyon kaa
Havaa ko raaz-daan karnaa paDaa hai
Wo shaayad koi sachchee baat kah de
Use phir bad-gumaan karnaa paDaa hai
Main apne saare patte faash kartaa
Magar aisa kahaan karnaa paDaa hai
Safar aasaan nahin haraf o qalam kaa
Hamen tai haft-khvaan karnaa paDaa hai
Thaa jis se ikhtilaaf-e-raa.e mumkin
Usee ko mehrbaan karnaa paDaa hai
Saf-e-a.adaa men apne baazuon ko
Mujhe 'akhtar' kamaan karnaa paDaa hai