honton pe qarz e harf e wafa umr bhar rahaa
— Akhtar Hoshiyarpuri
HonTon pe qarz-e-harf-e-wafa umr bhar rahaa
Maqrooz thaa so chup kee sadaa umr bhar rahaa
Kuchh darguzar kee un ko bhee aadat na thee kabhi
Kuchh main bhee apnee zid pe uDaa umr bhar rahaa
Wo tajrabe hue ki mire khuun kee khair ho
Yaaro main apne ghar se judaa umr bhar rahaa
Mausam kaa habs shab kee siyaahee faseel-e-shahr
Mujrim thaa sar jhukaa.e khaDaa umr bhar rahaa
Sub.h o masaa kee gardish-e-paiham ke baavajood
Main darmiyaan-e-sub.h-o-masaa umr bhar rahaa
In baarishon men kaun bahe khaar-o-khas ke saath
Sooraj kee le ke sar pe ridaa umr bhar rahaa
Haathon se oT kee to sabhee ungliyaan jaleen
Phir bhee havaa kee zad pe diyaa umr bhar rahaa
Ik khuun kee khaleej mire saamne rahee
Aur mere peechhe saaya miraa umr bhar rahaa
'akhtar' ye jangalon men usee ke nishaan hain
Jo khaar khaar aabla-paa umr bhar rahaa