khvaahishen itnii badhiin insaan aadhaa rah gaya

Khvaahishen itnee baDheen insaan aadhaa rah gaya Khvaab jo dekhaa nahin wo bhee adhooraa rah gaya Main to us ke saath hee ghar se nikal kar aa gaya Aur peechhe ek dastak ek saayaa rah gaya Us ko to pairaahanon se koi dilchaspee na thee Dukh to ye hai rafta rafta main bhee nangaa rah gaya Rang tasveeron kaa utraa to kaheen Thahraa nahin Ab ke wo baarish huee har naqsh pheekaa rah gaya 'umr bhar manzar-nigaaree khuun men utree rahee Phir bhee aankhon ke muqaabil ek dariyaa rah gaya Raunaqen jitnee thiin dahleezon se baahar aa ga.iin Shaam hee se ghar kaa darvaaza khulaa kya rah gaya Ab ke shahr-e-zindagee men saaneha aisa huaa Main sadaa detaa use wo mujh ko taktaa rah gaya Titliyon ke par kitaabon men kaheen gum ho ga.e MuTThiyon ke aa.ine men ek chehra rah gaya Rail kee gaaDee chalee to ik musaafir ne kahaa Dekhnaa wo koi station pe baiThaa rah gaya Main na kahtaa thaa ki ujlat is qadar achchhee nahin Ek paT khiDkee kaa aa kar dekh lo vaa rah gaya Log apnee kirchiyaan chun chun ke aage baDh ga.e Main magar saamaan ikaTThaa kartaa tanhaa rah gaya Aaj tak mauj-e-havaa to lauT kar aa.ee nahin Kya kisee ujDe nagar men diip jaltaa rah gaya Ungliyon ke naqsh gul-daanon pe aate hain nazar Aao dekhen apne andar aur kya kya rah gaya Dhoop kee garmee se eenTen pak ga.iin phal pak ga.e Ik hamaaraa jism thaa 'akhtar' jo kachchaa rah gaya