kuchh naqsh huvaidaa hain khayaalon kii dagar se
— Akhtar Hoshiyarpuri
Kuchh naqsh huvaidaa hain khayaalon kee Dagar se
Shaayad kabhi guzraa huun main is raah-guzar se
Galiyaan bhee hain sunsaan dareeche bhee hain khaamosh
Qadmon kee ye aavaaz dar aa.ee hai kidhar se
Taaqon men charaaghon kaa dhuaan jam saa gaya hai
Ab ham bhee nikalte nahin ujDe hue ghar se
Kyuun kaaghzee phoolon se sajaataa nahin ghar ko
Is daur ko shikva hai mire zauq-e-hunar se
Saa.e kee tarah koi ta.aaqub men ravaan hai
Ab bach ke kahaan jaa.enge ik sho.abda-gar se
'akhtar' ye ghane abr baDe tang-nazar hain
UTThe hain jo dariyaa se to dariyaa pe hee barse