kya puuchhte ho mujh se ki main kis nagar kaa thaa

Kya poochhte ho mujh se ki main kis nagar kaa thaa Jaltaa huaa charaagh miree rah-guzar kaa thaa Ham jab safar pe nikle the taaron kee chhaanv thee Phir apne ham-rikaab ujaalaa sahar kaa thaa Saahil kee giilee ret ne bakhshaa thaa pairahan Jaise samundaron kaa safar chashm-e-tar kaa thaa Chehre pe uDtee gard thee baalon men raakh thee Shaayad wo ham-safar mire ujDe nagar kaa thaa Kya cheekhtee havaaon se ahvaal poochhtaa Saaya hee yaadgaar mire ham-safar kaa thaa Yaksaaniyat thee kitnee hamaare vajood men Apnaa jo haal thaa vahee aalam bhanvar kaa thaa Wo kaun thaa jo le ke mujhe ghar se chal paDaa Soorat khizar kee thee na wo chehra khizar kaa thaa Dahleez paar kar na sake aur lauT aa.e Shaayad musaafiron ko khatar baam-o-dar kaa thaa Kachche makaan jitne the baarish men bah ga.e Varna jo meraa dukh thaa wo dukh umr bhar kaa thaa Main us galee se kaise guzartaa jhukaa ke sar Aakhir ko ye muaamla bhee sang-o-sar kaa thaa Logon ne khud hee kaaT diye raaston ke peD 'akhtar' badaltee rut men ye haasil nazar kaa thaa