main us kaa naam ghule paaniyon pe likhtaa kya
— Akhtar Hoshiyarpuri
Main us kaa naam ghule paaniyon pe likhtaa kya
Wo ek mauj-e-ravaan hai kaheen pe ruktaa kya
Tamaam harf mire lab pe aa ke jam se ga.e
Na jaane main ne kahaa kya aur us ne samjhaa kya
Sabhon ko apnee gharaz thee sabhon ko apnee baqaa
Mire liye mire nazdeek koi aataa kya
Ubhartaa chaand miraa ham-safar thaa dariyaa men
Main Doobte hue sooraj ko muD ke taktaa kya
Parinde ghar kee munDeron pe aa ke baiTh ga.e
Main ajnabee thaa ishaara koi samajhtaa kya
Firaaq o vasl to tasveeren un ke naam kee hain
Main in men rang kisee ke lahoo se bhartaa kya
Main apne ghar men nahin thaa magar kaheen bhee na thaa
Udhar se mujh ko guzarte kisee ne dekhaa kya
Tamaam shahr ravaan hai mire ta.aaqub men
Main aap kya mire ghar kee taraf ko rastaa kya
Ye raushnee kabhi pahle na thee yahaan 'akhtar'
Sitaara raat kee palkon pe koi chamkaa kya