manzilon ke faasle diivaar o dar men rah gae

Manzilon ke faasle deevaar-o-dar men rah ga.e Kya safar thaa mere saare khvaab ghar men rah ga.e Ab koi tasveer bhee apnee jagah qaa.em nahin Ab havaa ke rang hee meree nazar men rah ga.e Jitne manzar the mire ham-raah ghar tak aa.e hain Aur pas-e-manzar savaad-e-rah-guzar men rah ga.e Apne qadmon ke nishaan bhee band kamron men rahe Taaqchon par bhee diye khaalee nagar men rah ga.e Kar ga.ee hai naam se ghaafil hamen apnee shanaakht Sirf aavaazon ke saa.e hee khabar men rah ga.e Naa-khudaaon ne palaT kar jaane kyuun dekhaa nahin Kashtiyon ke to ka.ee takhte bhanvar men rah ga.e Kaisee kaisee aahaTen alfaaz kaa paikar baneen Kaise kaise aks meree chashm-e-tar men rah ga.e Haath kee saaree lakeeren paanv ke talvon men thiin Aur mere ham-safar gard-e-safar men rah ga.e Kya hujoom-e-rang 'akhtar' kya farogh-e-bu-e-gul Mausamon ke zaa.iqe booDhe shajar men rah ga.e