mere lahuu men us ne nayaa rang bhar diyaa

Mere lahoo men us ne nayaa rang bhar diyaa Sooraj kee raushnee ne baDaa kaam kar diyaa Haathon pe mere apne lahoo kaa nishaan thaa Logon ne us ke qatl kaa ilzaam dhar diyaa Gandum kaa biij paanee kee chhaagal aur ik charaagh Jab main chalaa to us ne ye zaad-e-safar diyaa Jaagaa to maahtaab kee kunjee sirhaane thee Main khvaab men thaa jab mujhe raushan nagar diyaa Us ko to us ke shahr ne kuchh bhee diyaa nahin Aur us ne phir bhee shahr ko tohfe men sar diyaa Meraa badan to radd-e-amal men khamosh thaa Meree zabaan ne zaa.iqa-e-khushk-o-tar diyaa Wo harf-aashnaa hai mujhe ye gumaan na thaa Us ne to sab ko naqsh-ba-deevaar kar diyaa Yuun bhee to us ne hausla-afzaa.ee kee miree Harf-e-sukhan ke saath hee zakhm-e-hunar diyaa Akhtar yahee nahin ki mujhe baal-o-par mile Us ne to umr bhar mujhe ehsaas-e-par diyaa