na jab koii shariik e zaat hogaa
— Akhtar Hoshiyarpuri
Na jab koi shareek-e-zaat hogaa
Miraa ham-zaad mere saath hogaa
Gharon ke band darvaazon men raushan
Vahee ik zakhm-e-ehsaasaat hogaa
Na yuun dahleez tak aao ki baahar
Galee men fitna-e-zarraat hogaa
Kurede jaao yuun hee raakh dil kee
Kaheen to sho.ala-e-jazbaat hogaa
Dareeche yuun to khul sakte nahin the
Havaaon men kisee kaa haat hogaa
Kitaabon men milenge sher mere
Miraa gham raunaq-e-safhaat hogaa
Yahee din men Dhalegee raat 'akhtar'
Yahee din kaa ujaalaa raat hogaa