pahle to soch ke dozakh men jalaataa hai mujhe
— Akhtar Hoshiyarpuri
Pahle to soch ke dozakh men jalaataa hai mujhe
Phir wo sheeshe men miraa chehra dikhaataa hai mujhe
Shaayad apnaa hee ta.aaqub hai mujhe sadiyon se
Shaayad apnaa hee tasavvur liye jaataa hai mujhe
Baahar aavaazon kaa ik mela lagaa hai dekho
Koi andar se magar toDtaa jaataa hai mujhe
Yahee lamha hai ki main gir ke shikasta ho jaa.oon
Soorat-e-sheesha wo haathon men uThaataa hai mujhe
Jism minjumla-e-aashob-e-qayaamat Thahraa
Dekhoon kaun aa ke qayaamat se bachaataa hai mujhe
Zalzala aayaa to deevaaron men dab jaa.oongaa
Log bhee kahte hain ye ghar bhee Daraataa hai mujhe
Kitnaa zaalim hai miree zaat kaa paikar 'akhtar'
Apnee hee saans kee suulee pe chaDhaataa hai mujhe