rukhsat e raqs bhii hai paanv men zanjiir bhii hai
— Akhtar Hoshiyarpuri
Rukhsat-e-raqs bhee hai paanv men zanjeer bhee hai
Sar-e-manzar magar ik boltee tasveer bhee hai
Mere shaanon pe farishton kaa bhee hai baar-e-giraan
Aur mire saamne ik malbe kee ta.ameer bhee hai
Zaa.icha apnaa jo dekhaa hai to sar yaad aayaa
Jaise in haathon pe kanda koi taqdeer bhee hai
Khvaahishen khuun men utree hain saheefon kee tarah
In kitaabon men tire haath kee tahreer bhee hai
Jis se milnaa thaa muqaddar wo dobaara na milaa
Aur imkaan na thaa jis kaa wo inaan-geer bhee hai
Sar-e-deevaar navishte bhee ka.ee dekhtaa huun
Pas-e-deevaar magar hasrat-e-taameer bhee hai
Main ye samjhaa thaa sulagtaa huun faqat main hee yahaan
Ab jo dekhaa to ye ehsaas hama-geer bhee hai
Yuun na dekho ki zamaana mutvajja ho jaa.e
Ki is andaaz-e-nazar men miree tash.heer bhee hai
Main ne jo khvaab abhee dekhaa nahin hai 'akhtar'
Meraa har khvaab usee khvaab kee ta.abeer bhee hai