shaakhon pe zakhm hain ki shaguufe khile hue
— Akhtar Hoshiyarpuri
Shaakhon pe zakhm hain ki shagoofe khile hue
Ab ke farogh-e-gul ke ajab silsile hue
Khursheed kaa jamaal kise ho sakaa naseeb
Taaron ke Doobte hee ravaan qaafile hue
Apnaa hee dhyaan aur kaheen thaa nazar kaheen
Varna the raah men gul-o-ghunche khile hue
Tum mutma.in raho ki na dekhen na kuchh kahen
Aankhon ke saath saath hain lab bhee sile hue
Maanaa kisee kaa dard gham-e-zindagee nahin
Phir bhee kisee ke dard se kya kya gile hue
Jo saans aa ke mas hue wo manzilen nahin
Lamhe jo ham pe biit ga.e faasle hue
'akhtar' mujhe ye Dar hai ki daaman na jal uThe
Paataa huun aansuon men sharaare mile hue