tilism e gumbad e be dar kisii pe vaa na huaa
— Akhtar Hoshiyarpuri
Tilism-e-gumbad-e-be-dar kisee pe vaa na huaa
Sharar to lapkaa magar shola-e-sadaa na huaa
Hamen zamaane ne kya kya na aa.ine dikhlaa.e
Magar wo aks jo aa.eena-aashnaa na huaa
Bayaaz-e-jaan men sabhee sher khoob-soorat the
Kisee bhee misra-e-rangeen kaa haashiyaa na huaa
Na jaane log Thaharte hain vaqt-e-shaam kahaan
Hamen to ghar men bhee rukne kaa hauslaa na huaa
Wo shahr aaj bhee mere lahoo men shaamil hai
Wo jis se tark-e-ta.alluq ko ik zamaanaa huaa
Yahee nahin ki sar-e-shab qayaamaten TooTeen
Sahar ke vaqt bhee in bastiyon men kya na huaa
Main dasht-e-jaan men bhaTak kar Thahar gaya 'akhtar'
Phir is ke baad miraa koi raastaa na huaa