tuufaan e abr o baad se har suu namii bhii hai
— Akhtar Hoshiyarpuri
Toofaan-e-abr-o-baad se har-soo namee bhee hai
PeDon ke TooTne kaa samaan deedanee bhee hai
Arzaan hai apne shahr men paanee kee tarah khuun
Varna wafa kaa khuun baDaa qeemtee bhee hai
Yaaro shaguft-e-gul kee sadaa par chale chalo
Dasht-e-junoon ke moD pe kuchh raushnee bhee hai
TuuTe hue makaan hain magar chaand se makeen
Is shahr-e-aarzoo men ik aisee galee bhee hai
Begaana-vaar guzree chalee jaa rahee hai ziist
MuD muD ke doston kee tarah dekhtee bhee hai
'akhtar' guzarte lamhon kee aahaT pe yuun na chaunk
Is maatamee juloos men ik zindagee bhee hai