zamiin par hii rahe aasmaan ke hote hue
— Akhtar Hoshiyarpuri
Zameen par hee rahe aasmaan ke hote hue
Kaheen na ghar se ga.e kaarvaan ke hote hue
Main kis kaa naam na luun aur naam luun kis kaa
Hazaaron phuul khile the khizaan ke hote hue
Badan ki jaise havaaon kee zad men koi charaagh
Ye apnaa haal thaa ik mehrbaan ke hote hue
Hamen khabar hai koi ham-safar na thaa phir bhee
Yaqeen kee manzilen tai kiin gumaan ke hote hue
Wo be-niyaaz hain ham mustaqil kaheen na ruke
Kisee ke naqsh-e-qadam aastaan ke hote hue
Har ek rakht-e-safar ko uThaa.e phirtaa thaa
Koi makeen na kaheen thaa makaan ke hote hue
Ye saaneha bhee mire aansuon pe guzraa hai
Nigaah boltee thee tarjumaan ke hote hue
Hidaayaton kaa hai mohtaaj naama-bar kee tarah
Faqeeh-e-shahr tilism-e-bayaan ke hote hue
Ajiib nuur se rishta thaa nuur kaa akhtar
Ka.ee charaagh jale kahkashaan ke hote hue